రివ్యూ : మెంటల్ మదిలో
కథ: అరవింద్ కృష్ణ (శ్రీవిష్ణు) పెద్ద కన్ఫ్యూజన్ మాస్టర్. అతడికి ఏ విషయంలో అయినా సరే.. ఆప్షన్లు ఇస్తే కన్ఫ్యూజ్ అయిపోతాడు. ఈ సమస్యతో ఇబ్బంది పడుతుున్న అతడికి పెళ్లిచూపుల్లో స్వేచ్ఛ అనే అమ్మాయితో పరిచయమవుతుంది. ఇద్దరికీ ఒకరికొకరు నచ్చుతారు. ఇక పెళ్లికి సిద్ధమవుతున్న తరుణంలో జాబ్ అసైన్మెంట్లో భాగంగా ముంబయి వెళ్తాడు అరవింద్. అక్కడ అతడికి రేణు (అమృత) అనే అమ్మాయి పరిచయమవుతుంది. ఆమెకు అరవింద్ ఆకర్షితుడవుతాడు. ఇక అతడి సమస్య మళ్లీ మొదటికొస్తుంది. ఇద్దరిలో ఏ అమ్మాయిని ఎంచుకోవాలో తెలియక అయోమయానికి గురవుతాడు. మరి ఈ ఇద్దరిలో అరవింద్ ఎవరిని ఎంచుకున్నాడు అన్నది మిగతా కథ.
కథనం-విశ్లేషణ: కొత్త కథలు ఎక్కడి నుంచే ఊడి పడవు. చుట్టూ ఉన్న మనుషుల జీవితాల్ని పరిశీలిస్తే.. మనుషుల్ని అంచనా వేయడం.. అర్థం చేసుకోవడం మొదలుపెడితే.. ప్రతి విషయమూ ఓ కథా వస్తువే అనడానికి ‘మెంటల్ మదిలో’ ఒక రుజువుగా నిలుస్తుంది. మనలో.. మన చుట్టూ ఉండే చాలామంది మనుషుల్లో ఉండే.. ఎవరూ గుర్తించని ఒక సామాన్యమైన లక్షణాన్ని కథా వస్తువుగా ఎంచుకుని దాని మీద రెండు గంటల సినిమాను తీసి మెప్పించినందుకు కొత్త దర్శకుడు వివేక్ ఆత్రేయకు హ్యాట్సాఫ్ చెప్పాల్సిందే. జీవితంలో కన్ఫ్యూజన్ లేని వ్యక్తి అంటూ ఎవరుంటారు..? ఏది ఎంచుకోవాలో తెలియక సతమతమయ్యే పరిస్థితి ప్రతి వ్యక్తి జీవితంలో నిత్యం ఎదురవుతూనే ఉంటుంది. అలాంటి కన్ఫ్యూజన్ చాలా ఎక్కువగా ఉన్న ఒక వ్యక్తి కథను ఎంతో అందంగా.. ఆహ్లాదకరంగా.. ఆలోచన రేకెత్తించేలా తెరమీద చూపించిన సినిమా ‘మెంటల్ మదిలో’.
మనిషి మతిమరుపు నేపథ్యంలో మారుతి తీసిన ‘భలే భలే మగాడివోయ్’ సినిమా చూశాం. ఐతే అందులో ‘మతిమరుపు’ అనే కాన్సెప్ట్ వినోదం పండించడానికే ఉపయోగించుకున్నాడు మారుతి. ఆ కాన్సెప్ట్ ను అతను చక్కగా కమర్షియలైజ్ చేశాడు. కాన్సెప్ట్ పరంగా చూస్తే ‘మెంటల్ మదిలో’ కూడా ఆ తరహా సినిమానే. ఐతే ఇక్కడ భిన్నంగా అనిపించే విషయ ఏంటంటే.. ‘కన్ఫ్యూజన్’ కాన్సెప్టుని కేవలం వినోదం కోసం వాడుకుని వదిలేయకపోవడం. దాని మీదే పూర్తి కథను నడిపించాడు. ఆరంభం నుంచి చివరి దాకా సినిమా హీరో తాలూకు ఈ ‘లక్షణం’ మీదే నడుస్తుంది. మొదట్లో దాన్నుంచి వినోదం పండించి.. ఆ తర్వాత దాంతోనే కథనూ మలుపు తిప్పాడు. దాన్నుంచో ఎమోషన్ కూడా రాబట్టాడు. వివేక్ ఎంత నిజాయితీగా సినిమా తీసే ప్రయత్నం చేశాడో చెప్పడానికి ఇది రుజువు.
‘మెంటల్ మదిలో’లో ప్రత్యేకంగా అనిపించే మరో విషయం.. ఇందులోని సహజత్వం. సినిమాలో ఎక్కడా కూడా డ్రామాకు చోటే లేదు. ప్రతి పాత్రా.. ప్రతి సంభాషణా.. ప్రతి సందర్భం.. చాలా సహజంగా అనిపిస్తాయి. మనకు తెలిసిన మనుషుల్నే తెరమీద చూస్తున్న భావన కలుగుతుంది. యునీక్ గా అనిపించే ప్రధాన పాత్రలు సినిమాకు మరో పెద్ద బలం. ప్రతిదానికీ కన్ఫ్యూజ్ అయ్యే ఓ అబ్బాయి.. తనకేం కావాలో బాగా తెలిసి చాలా కాన్ఫిడెంట్ గా జీవితాన్ని లీడ్ చేసే ఓ అమ్మాయి.. లోపల ఎంతో బాధను దాచుకుని పైకి చాలా సరదాగా.. అంతుచిక్కని విధంగా కనిపించే మరో అమ్మాయి.. ఇలా ఏ పాత్రకు ఏ పాత్రకు ఒక వ్యక్తిత్వం కనిపిస్తాయి. ఆ పాత్రల తాలూకు లక్షణాల్ని ఎస్టాబ్లిష్ చేసిన తీరు కూడా మెప్పిస్తుంది. ప్రతి పాత్రనూ ప్రేక్షకుడు ఓన్ చేసుకునేలా వాటిని తీర్చిదిద్దాడు దర్శకుడు.
ప్లస్ పాయింట్స్:
సినిమాకి అతిపెద్ద ప్లస్ పాయింట్ శ్రీ విష్ణు పాత్ర. ఎప్పుడూ స్తబ్దుగా, కన్ఫ్యూజన్లో ఉండే కుర్రాడిగా శ్రీ విష్ణు చాలా బాగా సెట్టయ్యాడు. ఆ పాత్ర ప్రేక్షకులకు వెంటనే కనెక్టైపోయేలా ఉంది. అందులో శ్రీవిష్ణు నటించిన తీరు కూడా బాగా ఆకట్టుకుంది. హీరోయిన్ నివేత పేతురేజ్ మొదటి సినిమాతోనే మంచి ఇంప్రెషన్ తెచ్చుకుంది. స్వేచ్ఛ పాత్రలో ఆమె నటన, స్క్రీన్ ప్రెజెన్స్ బాగుంది. ఆమె వలన సినిమాకి, సన్నివేశాలకి కొత్తదనం, ఆహ్లాదం తోడయ్యాయి. ఆమెకి, శ్రీవిష్ణుకి మధ్యన రొమాంటిక్ ట్రాక్ కూడా బాగుంది.
సినిమాలోని మిడిల్ క్లాస్ సెటప్ కూడా చాలా బాగుంది. నటుడు శివాజీ రాజాకు చాలా రోజుల తర్వాత మంచి రోల్ లభించింది. ఆయన కూడా ఆ పాత్రలో బాగానే నటించారు. శ్రీవిష్ణుకి అతనికి మధ్యన మంచి ఫన్ జనరేట్ అయింది. దర్శకుడు వివేక్ ఆత్రేయ చాలా సహజమైన, అవసరమైన పాత్రలను మాత్రమే రాసి సినిమాకు సహజత్వాన్ని తీసుకొచ్చారు. సినిమా నిర్మాణ విషయంలో ఎక్కడ రాజీ పడకుండా నిర్మించారు నిర్మాత రాజ్ కందుకూరి. మూవీ రిచ్ గా ఉండి నిర్మాణ విలువలు బాగున్నాయి
మైనస్ పాయింట్స్:
సినిమా మొదటి అర్థ భాగాన్ని మంచి రొమాంటిక్ గా, చాలా ఇంప్రెసివ్ గా చూపించడంతో సెకండాఫ్ కూడా అలానే ఉంటుందనే అంచనాలు పెరిగాయి. కానీ దర్శకుడు మాత్రం సెకండాఫ్ ను 15 నిమిషాల పాటు గ్రిప్పింగా లేని నరేషన్ తో నడిపించాడు. దీంతో ఆ కొద్దిసేపు బోర్ అనిపించింది.
సెకండ్ హీరోయిన్ కు హీరోకు మధ్యన ప్రేమ బంధాన్ని ఎస్టాబ్లిష్ చేయడానికి ఎక్కువ సమయమే తీసుకున్నాడు దర్శకుడు. అంతేగాక కొన్ని సన్నివేశాలు కొంచెం ఎక్కువ లెంగ్త్ ఉన్నాయి కూడ
విడుదల తేదీ : నవంబర్ 24, 2017
రేటింగ్ : 3/5
దర్శకత్వం : వివేక్ ఆత్రేయ
నిర్మాత : రాజ్ కందుకూరి
సంగీతం : ప్రశాంత్ ఆర్ విహారి
నటీనటులు : శ్రీ విష్ణు, నివేత పేతురాజ్, అమృత
